لساها برضو بتتكتب عنوان
جاي وحالف أكون الأول
جناحاتي كتير
ليا ف كل سطوح حوالينا
مرصد فلكي من العصافير
بعرف اخمن
امته وفين
هطلع آديني سلالم شهره
وهكتب نكتة عن المساطيل
هسرد كل بنود الخطة
وهسرق سقفة من الجماهير
اللي اختأرو يكونو ضحية
لواحد فاضي.. بس خطير
يمكن زيي في ناس في الزحمة
اتعلمت معاهم صوتي
وصوتي عشانهم أصلو زئير
ناس مش بس جديرة بدوري
لأ دي كمان حواديتها كتير
قادرة تسلي الناس عن حالها
تعمل واقع م الأساطير
دايرة اتقفلت فيها سعادتي
لافف واقف بلا تبرير
وبعد المرة الأولى انكشفَت
بس بقاوح يمكن أطير
سور متحدد من مية لفة
في أول لفة تحسه جدير
وقت وجهد اتبذله عشانه
ولاجل نهايته العمر يطير
واقف آديني في باب الحكمة
باخد رشفة من التدابير
جاي وحالف أكون الأول
أيوة هطير.
طرزان في غابته كان وحيد
ماكنش حاسس انه وحده
كان بيمشي زيهم.. فرحان سعيد
ماكنش فيهم حد ضده
رغم ان العقل بيقول عنه طريد
دنيتنا عنده معناه طرده
ازاي هيمشي من غير ايديه
وازاي قماش راح يبقى جلده
صعب يتعلم حياتنا
صعب نبقى احنا عنده
احنا زيه شاربين حياتنا
من غيرها نعطش أو نصدّي
الف فيلم ومليون مسلسل
عن حكاوي وحواديت بتعدي
ازاي نعيش زي اللي عاشو
ازاي نحب ازاي نكون ازاي نأدي
دورنا كان مرسوم واتعاش كتير
ليه نجيب وليه نودي
ليه نعيد الحرب تاني
خليها حرب فـ ماتش ودي
احنا نعلن احنا انتصرنا ...
وانتو تاخدو بترول وبردي
طرزان عشان طرزان وبس
من غير جيوش
ولا زيف وشوش
ولا وقت ضايع في التصنيفات
صيني وهندي
كان هوة واحد وسط آكلين اللحوم
ماكنش يعرف يعني ايه كلمة هموم
ولا حد قالله لما يحزن يعمل ايه
ولا امته يهجم أو يهدّي
كان بدون كل الحاجات
وماكانش شايف شِعر في كلمة سكات
ولا كان بيعشق واحدة لمجرد حاجات
كان طبيعي ... كان حقيقي... ماكانش هندي
كفايانا عيشة زينا
كفايانا تكرار للأفندي
طرزان أكيد لو عاش هنا
كان حس انه عاش لوحده
احنا أوحش م الوحوش
صعب يتخلف ما بيننا
صعب حد يسيبه وحده
وبدل مايتعلم حياتنا برغبة منه
هيكون بيتعلم يدوب في اللي أقوى منه
الحر بيننا بنقتله بمليون طريقة
ازاي يسيب الكدب ويغني الحقيقة
وزي ما احنا متكررين عن نسخة ماتت
هيكون بيعلن كدبنا ويقول حقيقة
طرزان ماهوش انسان في وسط وحوش
طرزان شباب عايش مابين طرابيش
طرزان ملاك ساكن مابين خفافيش
طرزان حقيقة كلنا عارفينها
بس الي عاش كداب
بالصدق صعب يعيش
لا تكن أنانيا فحسب
بل اقتنص فرصتك لتصبح ذلك الطائر الذي يستغل السماء والهواء و لا يأبه بجمهوره من البشر وصيادينه الوحوش ويتوقف عن التقدم للأمام و الصعود لأعلى ؛ ليستمتع .
اصرخ بكل ما أوتيت من قوة و بنعمة ربك فحدث كذئير ضرغام أخذ يجري حتى أستوى على قمة جبل استطاعه فذئر ! . لا تتردد في إقراض نفسك من الوقت والجهد اللذان تستحقهما.
لا تكن أنانيا فحسب بل اختر لنفسك من الموسيقى والألوان مايليق بشكر ربك على نعمة إدراكهم ولا تشارك إلا من يكافئك في حبه لنفسه فبعضهم يتوهم أو يوهم نفسه أنه يستمتع و بداخله صراعات لا تنتهي تنتصر فيها دائما نفسه اللوامة.
لن ينقص الهواء ويتضرر مستقبل الأجيال القادمة بشهيقك العميق من هواء لنفسك لا لتنفسك.
انتشل من داخلك ذاك الطفل الذي لم تدلله منذ نعومة أظافره فهو مهما طال الزمان سيظل قادرا على مكافئتك بقبلة تجعل من صعاب المستقبل كتحديات ألعاب الفيديو.
كن أنانيا وصارما مع وقتك الخاص ولا تترك ولو ثغرة واحدة يتسلل منها المشتتون و المتلصصون.
إنه وقتك أنت ... زمانك أنت... عصرك أنت... قلبك أنت.
ألا تستحق أنت من حين لحين أن توقف الآخرون عند حدودك لتتفرغ لك. ألا تستحق أنت أن تحيا لك.
كن أنانيا بكل ماتعنيه الأنانية مهما أشاعوا عنها أنها خلق سيء
... وليكن ؛ إلى متى ستظل كما أنت.
إن كنت تخشى شيئا في الأنانية ولا تدرك ما هو.. هو الإسراف . ولا أعتقد من ينصحوه بالأنانيه حين يكن أنانيا سيسرف فيها .
كن أنانيا وليكن ما يكون. ...
عدِّني العداد مواطن
شافني واحد من كتير
أسكن البيت الفلاني
يعني ساكن
مش خطير
ليا مسكة وعيلة واثقة
اني لايمكن هطير
هفضل الشيء المعلب
المقولب
المعد لمهنة في ضهر البطاقة
مش وزير
المواطن اللي واطن
وشاف بعينه حروب كتير
حرب بين الخلق دايرة
مين مواطن.. مين غفير
مين حدوده حدود بطاقته
ومين بطاقته حطان وسور
ياللي عادد صوتي صوت
اسمعه ... تلقاه زئير
مش عدد وسواد وزحمة
ولو عدد.. احنا الكتير
لو تعد سكوتنا صوت
ف انت نفسك صوت معانا
ياللي بتعد بضمير
تسكن البيت الفلاني
يعني ساكن
مش خطير
تصرخ روحي باسمك دائما
بتضرع الغرقى لمنة المنان
كأنك منقذي بعد الله أنادي
أشتاقك و أشتاق أن أسجد لله بامتنان
ها أنا ذا بقربك مؤثرا
مسمعا و مبصرا و آمرا ناهيا ... سلطان
ها أنا ذا أناديك هامسا
فتجيبني بلهفة بأطيب الكلام
ها أنا ذا بخيالي معذب
فلا أنت سامع ولا أنا معلن أنني ولهان
تصرخ روحي باسمك دائما
ويناديك صوتي هادئا بسلام
تصرخ روحي باسمك دائما
وتكتبك الحروف ككل الكلام
تصرخ روحي باسمك دائما
ويسمعني الله ويزيدني ولهان
يا نعمة تستوجب الشكر أن كنت ممكننا
ويستوجب الشكر تربعك على قمة الأحلام
يا هبة لا توهب إلا بالتضرع
وابتلاء بالصبر عليه يزيدني إحسان
تصرخ روحي باسمك دائما
يسمعني مستبصرين كثر
لكنك نائما عن متعة الأذهان
اطلق سراحك يا ملاك حبيبتي
ساعدها تطير كسائر الأجسام
الله أدعو دائما أن تسمعي
وإذا سمعتى فليس إلا سلام
سلام كسائر عاشقين الله
سلام كمن يرجو السلام من السلام
سبحانه قد ألهم قلبي عشقك
سبحانه سيجري على لساني التمام
تمام البدر أن ينشر نوره
وتمام محبتي ان تسمعي
ولابد ستختاري أن تكوني المدام
ودي كانت احد المحاولات الشاقه الرومانسية
الظاهر كبرنا ولازم نكتب سياسة :D
♡ X
مش شاعر
مؤمن الرفاعي
23-7-2017
يا جرعة عند مدمن
يا كعبة عند مسلم
يا سائلا جاء محسن
يا من يليق بك اسم مؤمن
هل لي بقبلة ؟
أذاك ممكن ؟!
يا جرعة عند مدمن
يا كعبة عند مسلم
يا سائلا جاء محسن
يا من يليق بك اسم مؤمن
يكفيك قتلي؟ ما الذي يرضيك؟ .
قلوب جديدة ع البعاد
وع الجهاد
وع الصمود في وش عقرب الساعات
قلوب بنبض من الإله
عارفة الطريق والاتجاه
فارشه العروق حب ومودة
واللي كان ساكنها تاه
وفجأه دون إذن وسماح
غاب اللي غاب وراح اللي راح
مابقاش متاح
مابقاش بيوصف حب طاهر
إلا السفاح
زي لما تثور وتهتف
وانت وحدك في الميدان
زي لما تبوح وتحلف
ان حبك مش جنان
وان عين العقل انك
تبقى صادق في الكلام
وان كل الخلق تعرف
معنى حبك للسلام
للمحبة بدون مبرر
للمحاورة والاهتمام
وان وحدك مش هتعرف
تعدل المايلة بأمان
زي ناس ع النت واعية
كل انتاجها كلام
عن غياب الوعي فيهم
هما مين أو هما كام
اللي شايفنا بنهزي
اللي شايفنا عوام
حد شافهم أو حد يعرف
فين مكانهم في الميدان ؟
ليه تملي احنا اللي نكتب
أو نعذبن م الشيطان
وليه بنقرا لبعض لما
عمر ما بيوصل كلام
وليه يا قاري تشك انك
اللي مقصود أو مرة خان
احنا زارعين المودة
واحنا اصلا في الجنان
في صحاري ماشافتش وردة
سايبنها ليه وجينا الميدان
هما أولى بالمحاورة
هما أجدر بالحنان
هما ناس ماراحتش جامع
والشيخ بيدعي للي كان
لزمتها ايه تقرا وتكتب
عن ضحية للكلام
اللي قالو وقالو جنة
واللي قالو تمام تمام
واللي قالو ثورة ثورة
واللي قالو أمان أمان
واللي قالو بلدنا أولى
واللي قالو سلام سلام
يلعن اليوم اللي شوفتك
يا حبيبتي كارهة الكلام
اسمحيلي أبوح وأقوللك
يا حبيبتي سلام سلام
حبيبتي خلاص الفجر أذّن
وانتي ذنب.. مش عبادة
ذنب كافي لطرد آدام
من جنان معنى السعادة
ذنب قالو كتير عليه
صده أشبه بالجحود
كالألم من غير ولادة
نعمه جت من غير دعاء
وهبة م الجواد يا سادة
مين في كل شيوخ زماننا
شاف و عاش معنى السعادة
كللهم شايفينها دنيا
للبلا أو للعبادة
أما أنا يا حبيبتي بيكي
في النعيم قبل الشهادة
يارب يقبل أكون جدير
وكل مرة أسمع أذان
ابقى قادر أتوب وأعود
للطريق اللي انتي آخره
جنتي انتي يا
غادة
عصافير و ريحة خبز و طراوة
ويمام قماري بتغوي وتلحّن
السيجة لعبتها مش قعدة وفضاوة
أجداد بتتحاكى و تتفنن
ضليلة جمعتهم يتباكو ع الأيام
وسقيفة الماضي ... خلاص بتتهدم
شاخو الجدود مش بس ع اللعبة
مات اللي مات و سكت اللي عاش منهم .
طلعت مباني كتير وحجبت الرؤيه
حتى النفس مكتوم ... مابقاش يطمنهم
زاوية بقت جامع و جامع بقى جامع
وفرحة الشبان حجبت مطالبهم
ازاي شباب واحباب
يبنوا الجديد واللي جاي
ع اللي بقى منهم .
عشرة خمستاشر سنة
مسحت معالمهم !
و احنا الشباب الهباب
أيامنا رافضة الكلام
ع اللي بقى منهم
حمراية أو ديوان
أو بيت بصوت عمران
يا حبيبي يا الله ... اغفرلي لو منهم
اللي ابتدوا بالخراب
اللي اعتدوا ع التراب
اللي اقتدوا باغراب
والعمر ضاع منهم .
عشرة خمستاشر سنة
مابقتش موجودة
لا بشكوى أو محكمة
راح تبقى حدوته
مش باقي منها مكان
ولا ريحة ولا دكان
ولا حتى بسكوتة
فين البلد يا بلد
ولا انتي حدوتة
وخلاص كلامك خلص
والله ملتوتة
والله ملتوتة
Money talks
لأنها محصورة في وهم الأرقام و النقوش الحسابية المتعارف عليها بين غالبية البشر باختلاف لغاتهم و مسارات تقدمهم سواء كان تقدما للخلف أو تقدما حقيقيا صوب الإنسانية
#الأرقام التي اخترعها ذاك العقل الجاهل بقدراته و المتناسي لميزته الأسمى في القدرة على التمييز
تجاهل العقل الجمعي واستعمل نفس النقوش الغبية و ترجماتها من #أكثر_من_و_أقل_من و #أكبر_من و #أصغر_من حتى أنه بات لا يقبل بالتوازن وصار يفتعل ثقلا فيما لا وزن له و عمقا لأجوف .
التطور وفقا لما يقيس به هؤلاء #الغالبية هو باطل بني على باطل
وهم تطور عن وهم
لسنا متخلفين بل أننا في المقدمة و هو نفسه رأيهم إن كانوا هم المتحدثون
إن تكلم #المال ف- وفقا للأرقام و للتبعية المسيسة تلك حقيقة
وبمعايير أخرى نحن لسنا نتخلف ولا نسير للخلف حتى إذا صار أغلبيتنا مثلهم بنفس العنصرية و التطرف و الكراهية للآخر وتبعاتها من الحقد على الماضي والحاضر و الحسد على كل ما هو ليس #money
كان طبيعي انك تكوني
اصل ليلي كان طويل
بعد ناس مليانة ضلمة
يطلع الصبح الجميل
كان طبيعي اسهر عشانك
وادعي انك يوم تكوني
ولما اتهجي كلامك
تظهري وتمليلي كوني
كنت بدعي وكلي خوف
بس طمعان انك تكوني
رحمة الرب الرؤوف
قالها كن ... فكنتي كوني
يا اللي منهومة لنور الله ذاكري
ياللا نبدأ ... شدي أزري
ياللا نقرا في كل علم
ياللا شاركيني جنوني
كنت بدعي ماكنتش اعرف
ان مسموحلي وحلال
كنت برسم فيكي واحلف
اني القاكي محال
فيوم وليلة ومن بس موقف
عرفت انك بت الحلال :D
بعد البعد دة كله تجيني
فاكر خيري وكل كلامي
ناسي ازاي انك مرفوض
وان كلامي كان معدود
وان اهانتك كانت كافيه
انك تنسي أي وعود
ثور لكرامتك
عزز نفسك
ارضى بانك تبقى غريب
هوة تمامك
هوة مكانك
هوة مصير أمثالك دايما
رفض و صد و يمكن أكتر لولا العيب
بعد رجوعك لازم اقوللك
انك ضيف لا أهلا بيه
إبعد قد ما تقدر تاني
وافتح بابك لأي غريب
شعب كتير مستني فراغك
رحب بيهم و املى مكاني
وأسرع مني هتلقى حبيب.
عن نملة
ياللي ضحيّت ولا حاجة
والجاني مش حاسس بيكي
عادي كانك ولا حاجة
ماشي في حاله وناسيكي
لاحس يوم ما كسر رجلك
ولا شافلك بيت بيحميكي
كسّر بخطوت رجله الحلم
وداس على كل ما فيكي
دمّر شوارع منطقتك
خرّب مصانع أهاليكي
والحمد لله انتي معانا
والرب قادر يشفيكي
وهتبقي أحسن م الأول
وتجري أسرع من ميكي
ياللا بسرعة ارجعي نملة
عايز أشوفك بتقاومي
وتثوري من أجل شبابكم
أو تبكي اطلال حواريكي
دة انتي النشاط كله نشاطك
بنضرب الأمثال بيكي
يا نملة اقري تاريخ الكل
وعرّفي العالم بيكي
اقري لحد ماتعرفي حجمك
كوني فخورة بما فيكي
يا نملة قومي وشدي الحيل
لازم تكتل يحميكي
قولي لصحابك بعد الشغل
هنعمل رابطة تجمّعنا
ونجيب خبير استراتيجي
هنحدد الجاني بعينه
يا نزعجه يا نسكن عينه
وننتقم علشان بكره
مايجيش فلان ابن فلانه
يدوس برجلة علي شقانا
ويموت بدهسة أحلى ما فينا
ويعيش معانا اللي اتدهسوا
راضيين كإن الدهس مصير
ولا فكروا يهاجرو الصحرا
ولا يعرفو غير التبرير
بيقولو معذور مستعجل
ازاي يشوفنا دة وحش كبير
واحنا يادوب قد النملة
وقد ليه... احنا النملة
ولا صوت هيسمع أو تحذير
مافيش في ايدنا الا التسليم
نشوفو جاي نقوم داخلين
واللي عليه الدور فينا
يحصّل اخواننا السابقين
قالو و هيقولو سذاجة
قالو وهيقولو اننا فاضيين
قالو وهيقولو دة كفر
ازاي نقاوم شرع ودين
احنا بنعمل حتي الموت
والحرب ليها جنود تانيين
سيبك يا نمله من الي يقول
قوليلي اساعدك بس ازاي
قالت بصوت ماسمعتوش
بس كان باين لهفتها
مكسورة بتجر باقتها
راحية لنقطة مية هناك
وتفادي عود كبريت مطفي
وفجأة شافت نقطة زيت
هربت بأعجوبة وقاوت
ساعتها قلت معاها ديناميت
وهتيجي عند بلاط الوحش
وتفجره وتعملها بيت
لقيتها رايحة يمين فجأه
باديها مسكت حبة سكر
و باقيها ناوي يكمل زحف
لحد نقطة مية هناك
ومنها ع البيت طوالي
وان كان كمان بيتها اتكسّر
هترممه ويبقالها مبيت
مش شاعر
#لا_حياة_لمن_تنادي
الى المشتاق و قلبه كل ليله يروح
وهوة مارحش
الى المستني من روحه تقول وتبوح
ولسا ماباحش
الى اللي لما يتنفس ، عشقه منه يفوح
وهوة مافاحش
كتم شوقه مع الأنفاس
وياريته مايتنفسش
بتتعد الليالي عليه
وهوة ما عاشش
بتنعاد السنين حواليه
كإنه ماعدش
بيتغير كل شيء في عنيه
ومايتغيرش
الى كل من فكر يقول فكره
بس ماقالش
الى كل من نفسه يعيش بكره
ومات وماعاشش
والى اللي عاش و مازال
مابيفكرش...
الى اللي استنى أحلامه تكون ممكن
ومابتكونش
الى اللي اختار قراية خربشات مؤمن
ماتتردش
خُد الماتش كانه موت وحياة
وموت ماتعشش
فدا الحلم اللي تتمناه
موت ماتخافش
ليه تشتاق مادام عارف طريق البيت
ليه ماتروحش
و ليه تعطش مادام ممكن تطلع بير
ليه ماتحفرش
وليه تستنى احلامك تكون هيا ...
روح للعرش
بيستناك هناك حلمك
محدش عاش نعيم حلمه
وما استقتلش
او ماتعبش
أو اشتاق واحتاج يقول كلمه
ونام وماقالش
آخر حد هيقرا وأبعد حد
أقل الناس في احتمالات... كتابة رد
صوتي عشانها فـ مواقف تافهة
بيعلن رعد
أكتر صوت لو يتكلم... بتملي وجد
لأ وكمان لما تسلم... بطلّع صهد
هيا وبس اللي بتتحكم
في ترموستاتي... حر و برد
ليها وبس ومش عارف ليه
بتكلم جد
وببقى حيادي وصارم جدا
ومش بنحاز لمشاعر حد
ليه مش عارف ببقى حكيم
وبختار دايما... لينا البعد
لأ وعشان المشهد يكمل
محتاج صد كتير مع عند
وبعد البعد
وبعد العند
وبعد ذواتنا ما بتتعلم
فينا الجلد
ببقى شهيد شاف الجنه
ولم يستشهد
لا انا قادر انهي الخيط الفاصل بيني وبينها
ولا انا قادر اوصل خيط الود
زي ما يونس شاف فـ سنان الكلب الميت شيء للمدح
شوفت حبك ليا طريق
صلى الله عليه وسلم ، علمنا الدرس بأجمل شرح
والتنفيذ محتاج لمغامر حر جرئ
قريت القصة وقلت ازاي ما اعملش الصح
لازم أبطل أشوف أسلوبك... حب خنيق
قلت أحاول أشوف في مشاعرك شيء للمدح
بلعني الحوت وشكل نهايتي هبقى غريق
يونس نادا فضلمت حوته ليل مع صبح
وكان الرد .... خروج من الضيق
وانا مش عايز أقوللك حاجة تسبب جرح
بس ياريت تاخديني صديق
ما أنفعكيش .... مش لازم شرح
عشت حياتي.. حر طليق.
يارب ساعدني وابني مابينا أطول صرح
وأبقى ف شرعك... بحق برئ
مصير الحي يتلاقى
الحي مصيره يقابل مين !
أنا حي بطيفك والسبحة
وآديني مستني بقالي سنين
لو حتى أشوفلك رؤيا واضحة .
بيقولوا أكيد نتلاقى فـ يوم
والدنيا هترقص مـ الفرحة
بيقولوا قدر ومصير محتوم
والبعد دة فاصل أو فسحة ...
روحتلهم أسأل امتى وفين
قالولي روح إحلم اوعاك تصحى
واتاريكي مصير ... لناس تانيين
يشوفوكي كتير جاية ورايحة .
عادي جدا يعني كأنك طين
مش روح خطفتني ف أول صدفة
مش روح وعدتني تكون وتكون
وقالتلي الجنة لمن أوفى
وفيت وخفيت وداريت مـ العين
والجنة بدونك هتكون منفى
كان في بلد
كان اسمها معصره
لساها برضو بتتكتب عنوان
بس الجديد لما يجيلك جواب
لازم تروحله أوام
هتلاقي بوسطة بلدنا
مترممة ومتزوأه بألوان
المبنى شادد حيله
ومثبت العنوان
معزور اكيد الجواب
فين بيت فلان وفلان
مش دي الشوارع والبيوت
مع انهم نفس المكان
مش عيب ادارة وكسل
بس الجواب قرفان
ازاي بلد تنعدم
من غير عدو أو طوفان
كان في بلد
كان اسمها معصرة
نفس البيوت نفس الحيطان
نفس المصاطب بره بيتك والجيران
كان ليها صوت
صيف أو شتا سهران
كان ليها ريحة
ومش قصدي ع اللبسان
كان فيها روح
طب فين اروح عشان اشوفها زمان
مؤمن الرفاعي
كقصيدة
تأبى أن تُكتب عامية
تبحث عن شاعر أغنية
يكتبها فتكون
كقصيدة
ترفض كل حدود المعنى
تجري بين ضفاف مسمّى
تسقي العاقل والمجنون
كقصيدة
كُتبت بالغةِ العربية
تنافسُ من كتب الألفية
تطمح أن يقرأها مليون
كقصيده
ثارت وانتحر مرادفها
هاجت و احتدمت أحرفها
وبالفاصلِ كلٍّ مسجون
كقصيده
يكتبها أبٌ عن ابنه
يحتفل بيوم تخرجه
و تخرَّج شكلا لا مضمون
إرسم لحلمك مركبه من غير شراع
وتكون عليها ربها... تؤمر تطاع
والموج معاك إن قلت ثورة
وإن قلت اهدا يقول مطاع
حاسس بحلمك خطوة خطوة
مؤمن بصدقك حتى النخاع
وان جيت تخون ولو لمره
وتعيش في بر بدون صداع
يفضل يردد إنه فاكر
حلم اللي كان لاجله شجاع
قادر يثور ويقول دة ظالم
وللعدل سمعا واستماع
يفضل يردد كلمه كلمه
إن القدر مش بالشراع
وان اللي يصبر لاجل صيده
خايف أكيد أو عقله ضاع
وازاي عشان الحوت يغور
الموج يثور سطحا وقاع
والبر مهما يكون أمان
مش ليك دة مخلوق للرعاع
تلتينها ميه وبحر ثاير
وتقولي أهرب م الصراع !
إرسم لحلمك أمواج كتير
أمواج بتتكلم لغات
ويوم يموت الحوت الكبير
ساعتها قول للدنيا تيجي
مادام ساعتها .. بحرك يساع
بحرك يساع
لست محور الكون لأحدهم ...
لست محور الأحداث و لا قبة أحلامهم . لست أحدا مؤثرا في هذا الكون ... لست إلا نفخة من روح الله بالكاد مؤثرا للملتصقين بنواة وجودي .
ينتهي العام بعد العام ويكاد يكون تأثير جناحي الفراشة التي رفرفت ف الشرق فأحدثت إعصارا في الغرب ... أقوى من قدرتي على إحداث تغييرا وتغيرا ملحوظ .
اللهم يا فاتح يا فتاح . أسألك صيبا نافعا من عظيم عطاياك يشكرك عليه بسببي الطير و البحر والشجر .
بدون منبر
ومن غير افتعال الشعر
بدون مايكات ولا مزامير
ومن غير حتى ورقة وحبر
بدون ناس مجذوبة للمكاتيب
ومن غير جهر
كتبت آديني سابع سطر
وبيقولو كلامي شعر
وفي غيري بيملى السطر
ويتسمى كلامه نثر :D
لأ وكمان في ناس تانيين
بيتسمى قلمهم حر
بيتغطو و يتدفو
و يعملو زي ما انا بعمل
ويتشهروا و يتفاخرو
كلام خالد ومن غير حفر
وخطي كمان بقى واضح
ومافيش قوانين لمنع النشر
بقول كل اللي عايز اقول
ومتغطي بلحاف فايبر
بقول كام كلمة ع الماشي
وبدوس انتر
الألم ...
يستعير البعض مادة أ ل م ليعبروا بدقة عما يقصدوه في وصف المعاناه أو المشاعر الدقيقة الهابطة أو السلبية أو المنهزمة .
لكنه يظل تشبيه وضرب ودرب من دروب الخيال إلى أن تطعمه .
أعني بذلك تمرد جسدك على ترتيبك لحروف الكلمه
فإن سبقت الميم اللام وبات واضحا أنك تأمل وتأمل وتأمل فيثور ليذكرك بأن اللام قد تسبق ...
ألم ...
ذاك لا يوصف ولا يجدر بنا أن نعبر عن صراعاتنا التي نملك أدوات الصراع فيها به.
حتى وإن كان هناك طب ودواء
لحظة واحدة من الألم الحقيقي ستجعلك تدرك أن التشبيه كان ظالم وقاس.
كيف لصراعك مع أفكارك أن يكون ألم !!
كيف لخذلانك في أشخاص مثلك يورث لك ألما
كيف لكل ما اخترت أن توصفه بأنه مصدر ألم أن يكون كذلك
إن صح التعبير فإنها آلام تافهة.
الألم الذي مصدره أنت لا أفعالك فتلوم نفسك
لا يستحق أن تستهلك الكلمة التي توصفه في أوجاع و أسقام و نتاج أخطاء .
إنه فجوة تكتشف حين السقوط فيها أن الوجود نفسه صار مصدر ألم
مهما كانت غريزة الرغبة في البقاء قوية
تجد نفسك قد تقايض علي الوجود بأن تتخلص من الألم .
#الحمد_لله
جيت يا بلدي وكلي شوق
اخدمك عافيه و ذوق
وابقى جندي من جنودك
زيي زي جنود حدودك
خبرتي رهن الاشارة
وعلومي توجدلك حضارة .
جيت من المعمل وم المكتبه
واتاريكي خربانة و مكركبة
جيت بكل حماس شبابي
وسمعت تشششش كبيرة
شمس اترمت في حضن حابي
يا بلاد خبيرة بالغباء
ايه استفادتك م الادعاء
ليه تقولي العلم قادر
ولما يتقدم يبقى هراء
ازاي اكون جاهز بحل
وتشوفي ان الحل عند مدام هناء
و تجيب موافقة و ختم واضح
ودمغتين وتبرعات للاغبياء
ليه لما قائد يبقى قائد
مايعرفش يؤمرهم باعدام هناء
متكتفه و الحبل سايب
وعاملة انك م الاتقياء
جيت يا بلدي وكلي شوق
شوق للتراب ...
مايهمنيش ابقى تحت أو ابقى فوق
وفي كل خطوة فوق ترابك
كنت بتمنى ابقى تحت
مش تحت مستني الموافقة من اللي فوق
ياريته فوق!
او يفوق
ويعرف ان نزولنا تحت
لازمله موافقه من اللي فوق
#ثرثرة
#كنوز_مغادرة
#روتين_دين_ابوكم_دينة_ايه
مشـ ــشاعر Published @ 2016 by مؤمن الرفاعي
